Teksa shifrat e infektimeve prej koronavirust paraqiten shqetësuese, në Ditën Ndërkombëtare të Rinisë, ministrja e Shëndetësisë, Ogerta Manastirliu bën një thirrje për të rinjtë, për respektimin e masave të thjeshta, për të shmangur infektimin nga Covid-19.
“Bëhuni ju mbrojtësit e vetes, të prindërve, të të afërmve, të më të dobtëve. Pak më shumë kujdes sot, shmang pasoja që nesër mund të rezultojnë fatale. Sa herë të dëgjoni deklarata të gënjeshtërta, të atyre që pandeminë e shohin jo si rrezik nga i cili duhet të mbrojnë njerëzit, por si shansin që duhet rrokur në ajër për të çoroditur dynjanë me sulme të paprincipta, ndaluni dhe dëgjoni pak edhe thirrjet e ekspertëve të shëndetit, mjekëve, që dinë çfarë thonë dhe çfarë bëjnë dhe që, e kanë treguar me vepra, se i shërbejnë me përkushtim vetëm interesit tuaj”, shkruan ministrja, teksa ndan foton e një mjeku me maskë mbrojtëse.
Ajo i fton të rinjtë që sa herë të dëgjojnë deklarata të papërgjegjshme mbi ekzistencën e virusit, të mendojnë për ata njerëz që po vuajnë në spital, për shkak se nuk mbushen dot me frymë, me virusin që u ka “pushtuar” mushkërinë.
“Mendoni pak për të afërmit, që presin me ankth për fatin e njerëzve të tyre të dashur. Mendoni për gjithë ata mjekë, infermierë, në Spitalin Infektiv në QSUT dhe në Spitalin “Shefqet Ndroqi”, të cilët që prej marsit nuk po dallojnë më natën nga dita, e që nuk i shohin të afërmit, qysh kush e di se kur.
Mendoni pak: A është vërtet një sakrificë kaq e madhe, të heqësh dorë nga festat e mbipopulluara, nga vendgrumbullimet në plazhe dhe bare, pa distancim fizik dhe masa higjene? Vende që më pas shndërrohen në vatra, ku virusi përhapet me shpejtësi marramendëse? A nuk ia vlen që edhe për ca kohë, të përshtatemi të gjithë bashkë me një normaliteti të ri, ku kryefjala është kujdesi, higjena, distancimi?”, shton ministrja.
Në vijim shprehet se e kupton indiferencën e moshës, ndaj thirrjeve për një virus që nuk shihet me sy, por sipas saj kjo nuk e pengon që virusi ta shndërrojë trupin e tyre në bartës, në rrugëtimin e vet drejt trupit të prindërve dhe të afërmve, për të cilët shprehet se ndryshe nga rinia, për shkak të moshës dhe imunitetit, mbase nuk do të ishin në gjendje ta përballonin sëmundjen.
“Ju lutem edhe si familjare, si nënë dhe si vajzë prindërish të moshuar: Bëni një “sakrificë” të vogël sot. Ua keni borxh prindërve dhe të afërmve! Të gjithë po bëjmë maksimumin që mundemi, me kapacitetet që kemi në dispozicion dhe që nuk janë të pafundme, për të përballuar gjendjen e pandemisë.
Por, nuk duhet të ushqejmë iluzione: Pa mirëkuptimin tuaj, pa bashkëpunimin me autoritetet shëndetësore dhe zbatimin e rregullave që këto autoritete kanë nxjerrë, kjo përpjekje bëhet shumë e vështirë”, shkruan ndër të tjera Manastirliu.
Ajo i uron “Gëzuar Festën” dhe i fton që ta kalojnë këtë ditë, duke reflektuar pak më shumë mbi peshën e madhe që ka sjellja dhe përgjegjshmëria e tyre, në këtë kohë sfiduese që po kalon Shqipëria dhe e gjithë bota.
VAZHDO TË LEXOSH MË TEPËR PËR TEMËN
Manastirliu del me deklaratën e jashtëzakonshme dhe komunikon planin e ri të masave për COVID-19
Manastirliu: Koronavirusi mund të prekë edhe Shqipërinë, nuk jemi imun!
