Ndërsa shumë vende të botës po përpiqen që të mbajnë nën kontroll valën e dytë të pandemisë së koronavirusit, Tajvani sapo ka shënuar 200 ditë radhazi pa asnjë rast të transmetuar lokal me Covid-19.
Pavarësisht se është afër Kinës dhe ka vëllime të larta udhëtimesh dhe tregtie, Tajvani ka regjistruar vetëm shtatë vdekje nga Covid-19 gjatë kësaj periudhe të pandemisë.
Arritja historike e Tajvanit vjen në një javë kur Franca dhe Gjermania po vendosin bllokime të reja dhe Shtetet e Bashkuara identifikuan një rekord prej 88,000 raste plus në ditë.
Tajvanit nuk i është dashur kurrë të vendosë masa të rrepta. As nuk iu drejtua kufizimeve drastike të lirive civile, si në Kinën kontinentale.
Por në vend të kësaj, përgjigja e Tajvanit u përqendrua në shpejtësinë. Autoritetet tajvaneze filluan të kontrollonin pasagjerët e fluturimeve direkte nga Wuhan, ku virusi u identifikua për herë të parë, në 31 dhjetor të vitit 2019.
Rastin e parë Tajvani e konfirmoi në 21 janar të 2020-s. Menjëherë ndaloi banorët e Wuhan që të udhëtonin drejt ishullit. Të gjithë udhëtarëve që mbërrinin nga Kina kontinentale, Hong Kong dhe Makao u kërkohej t’i nënshtroheshin testimit të Covid-19.
