Kjo ishte pamja në zonën e ish-bllokut në kryeqytet mesditën e së premtes. Distanca fizike nuk respektohet edhe pse kjo është konsideruar si zonë me rrezik të lartë të përhapjes së COVID-19.
Anëtarja e Komitetit Teknik të Ekspertëve për COVID-19, Eugena Tomini shpjegon se përse po mendohet mbyllja e bareve në këtë zonë pas orës 22:00.
“Shtimi i pozitivitetit, numri i rritur i pacienteve në spitale dhe rastet e rënda të hospitalizuara dhe raste vdekjesh, dhe me këtë nivel pozitiviteti dhe transmetueshmërie komunitare bëri që Komiteti Teknik të vlerësoje për masat e tjera. Po vëzhgojmë elementet ku kemi grumbullime masive, rini ku grumbullohen më shumë që edhe pse e kalojnë lehtë janë transmetues të gjeneratave”.
Por ish-Blloku nuk është e vetmja ku masat nuk respektohen. Kjo është një tjetër lagje e kryeqytetit. Sipas Eugena Tominit, nuk përjashtohet shtrirja e masave kufizuese edhe në pjesë të tjera të Tiranës për të mos shkuar në karantinë totale apo edhe gjeografike edhe pse masë nuk përjashtohet:
“Rikthimi karantinës gjeografike apo totale…po vlerësohen të gjitha opsionet me mbyllje oraresh. Do jetë opsioni i fundit që do ndërmerret”.
Ndërkohë përhapja e koronavirusit po bëhët nga çdo grupmoshë, më pak nga ajo 5-14 vjeç:
“Shpërndarje në të gjitha grupmoshat, por kemi një pozitivitet që shkon nga 25% -30% tek grupmosha aktive. Pozitivet te të lartë mbi 50 vjeç. Dhe shenja klinike të rënda mbi 70 vjeç”
Pas vendimit të komitetit të ekspertëve për COVID-19 për të mos rikthyer studentët në auditore, por mësimi të zhvillohet online, burimet bënë me dije se përveç kufizimit të orarit të aktivitetit pas orës 22:00, një tjetër opsion mbetet edhe kufizimi i aktivitetit të bareve pas orës 20:00.
Biznesi refuzon skenarin e një mbyllje të dytë të ekonomisë
Bizneset thonë se në mënyrë kategorike, një mbyllje e dytë e ekonomisë e sidomos e qarkullimit të lirshëm të qytetarëve do të ishte katastrofike për ta:
“Do të kishte jo vetëm faliment në masë, por dhe prishje e rendit kushtetues dhe konflikte civile.
Industria e turizmit ndodhet që tani në kolaps, një skenar i një mbyllje të dytë do të na çonte në katastrofë”.
Gjergj Buxhuku thotë se kanë sinjale për diskutimin e një skenari për kufizim të lëvizjes së qytetarëve. Për të, fatura është më e lirë nëse do të investohej në kapacitete shëndetësore se mbyllja e bizneseve dhe konsumatorëve:
“Është më shumë me leverdi ekonomike të investosh në kapacitete spitalore se në mbyllje të qytetarëve dhe bizneseve. Kemi sinjale që po diskutohet skenari i mbylljes, ne ndjekim vendet e Europës në këto shembuj por nuk kemi të njëjtën ekonomi”.
Aktualisht turizmi dhe shërbimet janë sektorët më prekur nga pandemia, një pjesë e tyre po mbijetojnë për të paguar faturat përmes shitjeve në bare e restorante. Bizneset e këtij sektori thonë se nëse ka mbyllje tjetër faturën duhet ta paguajë qeveria:
“Si në të gjithë vendet e tjera dhe në rajon, nëse mbyllemi sërish faturën ta paguajë ai që na mbyll”.
Turizmi shqiptar, sipas të dhënave të shoqatës, ka përfituar vetëm 4 milionë Dollarë në formën e një page 40 mijë Lekë për punëtorët, ndërsa vendet e tjera të rajonit po paguajnë afro 70% të pagave ndërsa po ofrojnë grante për të gjithë operatorët në këtë treg.
VAZHDO TË LEXOSH MË TEPËR PËR TEMËN
