Reagimi i parë nga ndërkombëtaret për emërimin e Sonila Bejtes në Gjykatën Kushtetuese ka ardhur nga ambasadori i Bashkimit Europian.
Ambasadori i BE-së në Shqipëri, Luigi Soreca ka përgëzuar presidentin Ilir Meta dhe Këshillin e Emërimeve në Drejtësi (KED), duke shkruar se ky vendim përforcon funksionalitetin e Gjykatës Kushtetuese.
“Sot presidenti Ilir Meta ka dekretuar Sonila Bejten si anëtaren e 7-të të Gjykatës Kushtetuese. Përgëzoj presidentin Ilir Meta. Ky vendim përforcon funksionalitetin e Gjykatës”, shkruan Soreca.
Gjykata Kushtetuese javën e parë u bë funksionale, pas më shumë se dy vitesh, dhe tashmë u zgjodh edhe anëtari i shtatë që përforcon më tej funksionalitetin e kësaj gjykate.
Nuk ka vonuar as reagimi i ambasadores amerikane Yuri Kim.
Ambasadorja reagon pas emërimit të anëtarit të shtatë të Gjykatës Kushtetuese, duke theksuar se puna duhet të vazhdojë papushim deri në formimin e plotë të kësaj gjykate.
“Faleminderit Presidentit Ilir Meta për dekretimin e kësaj mbrëmje gjyqtari i 7-të i Gjykatës Kushtetuese. Duke vepruar së bashku me urgjencë – në përgjigje të drejtpërdrejtë të opinionit të Venecias, kushtit të BE dhe kërkesës së popullit shqiptarë – Presidenca, Parlamenti kanë bërë Gjykatën Kushtetuese funksionale para datës 31 dhjetor”– shkruan ajo.
