Mazhoranca e ka mirëpritur propozimin e opozitës për të shtyrë afatin e kartave të identitetit deri më 30 prill. Pas kryeministrit Edi Rama, ka folur për mediat dhe ministri i Brendshëm Blendi Çuçi, i cili thekson se askush nuk do të mbetet pa votuar.
“Me kompaninë Aleat ashtu si në vazhdim po bëjmë përpjekjet që shtetasit të kenë një dokument të vlefshëm. Ne jemi në bashkëpunim dhe në komunikim të vazhdueshëm me kompaninë ashtu si kemi qenë sot për shtyrje të afatit. Çdo gjë është nën kontroll. Asnjë shqiptar nuk do të mbetet pa votuar nëse ka vullnetin për të votuar”, tha ministri.
Ai u pyet gjithashtu nëse po respektohen masat anti-Covid gjatë takimeve politike.
“Kjo pyetje do të ishte nëse nuk do të ishte ndëshkuar ndonjë ministër. Porosia është e qartë, askush nuk do të tolerohet. Vullneti jonë është i shprehur qartë. Përfitoj nga rasti tu bëj thirrje të gjithë partive politike, kandidatëve, që të mundohen të respektojnë në maksimum këto rregulla”, tha Çuçi.
