Shkrimtari i njohur ndërkombëtarisht, Ismail Kadare, është vlerësuar me titullin “Nderi i Bashkisë së Fierit”, me motivacionin: “Për kontributin e jashtëzakonshëm që i ka dhënë ndër vite letërsisë shqipe dhe për promovimin e saj në nivelet më të larta të kulturës botërore”.
Çmimi iu dorëzua në sallën e teatrit nga kryebashkiaku Armando Subashi. Gjeniu i letrave shqiptare foli i emocionuar, teksa rikthehej në qytetin e Fierit pas 30 vitesh, këtë herë si qytetar nderi.
“Jam i lumtur që jam midis jush, besojeni… Për shkrimtarin, sado i dëgjuar të jetë, dashuria e lexuesit është e shtrenjtë, prandaj ju falënderoj nga zemra për këtë pritje kaq të bukur, të ngrohtë e kaq shqiptare”, – u shpreh shkrimtari.
Aktiviteti u zhvillua në teatrin “Bylis”, ku referuan akademiku Ali Aliu, Profesori i Letërsisë Sadik Bejko, Klara Kodra dhe Majlinda Rama.
“Është në nderin tonë të presim një mysafir të veçantë, që me veprën e jashtëzakonshme u bë simboli ynë më i ndritshëm”, – tha Rama.
Ndërsa Aliu, u shpreh se “lexuesi shqiptar, për herë të parë lexon në gjuhën e tij, veprën e një gjeniu si Kadare”. Sadik Bejko, theksoi se” Kadare është një udhëheq shpirtëror, për të gjithë shkrimtarët shqiptarë që erdhën pas tij”.
Referatet rreth krijimtarisë dhe karrierës së suksesshme të Kadaresë, u përcollën me interpretimin brilant, të aktorit të njohur, Timo Flloko dhe aktorit të teatrit “Bylis”, Klajdi Marku.
VAZHDO TË LEXOSH MË TEPËR PËR TEMËN
“Evropa do të zhduket nën dallgët e populizmit”
