Në Shqipëri, Gjykata e Posaçme e Shkallës së Parë kundër Korrupsionit dhe Krimit të organizuar dënoi sot me 2 vjet burgim dhe 5 vjet përjashtim nga funksionet publike, ish Prokurorin e Përgjithshëm Adriatik Llalla. Ai u gjet fajtor, sipas Gjykatës për “fshehje dhe mosdeklarim të pasurisë”. Paralelisht Gjykata vendosi dhe sekuestrimin e disa pronave të zotit Llalla që deri më tani ishin nën sekuestro.
Fillimisht, zoti Llalla, u dyshua për të paktën katër vepra penale, që nga mosdeklarimi i pasurisë, te mosdeklarimi i të hollave në kufi, shpërdorimi i detyrës dhe pastrimi i parave. Por në përfundim të hetimeve tre prej këtyre akuzave duket se nuk u arrit të provohen, dhe gjithshka u reduktua te mosdeklarimi i pasurisë, i konsideruar më shumti një kundravajtje penale që sipas legjislacionit shqiptar dënohet nga gjobë deri në 3 vjet burgim.
Hetimi pasuror ndaj zoti Llalla, u bazua në të ashtuquajturin ligji Antimafia, sipas të cilit, barra e provës për të dëshmuar se pasuritë e sekuestruara janë të ligjshme, i takonte ish Prokurorit të Përgjithshëm. Bëhet fjalë për një apartament banimi, me sipërfaqe 67.2 m², ndodhur në Durrës, blerë në vitin 2012; një sipërfaqe toke bujqësore prej 4.500 m², e blerë në vitin 2016; një jetër sipërfaqe, e llojit tokë arë,prej 12.300 m², ndodhur në Tiranë, e blerë në vitin 2017; një tjetër sipërfaqe toke prej 3 mijë metrash katrorë e blerë po në vitin 2017, si dhe 2250 metra katrorë, po e llojit tokë arë, ndodhur në Tiranë, blerë në të njejtin vit. Sipas gjykatës, pasuritë e tij janë rivlerësuar nga 2 deri 16 herë, duke bërë që vlerat e tyre të kapin shifra të larta.
Gjykata u shpreh gjithashtu se ish Kryeprokurori nuk ka justifikuar me burime të ligjshme dhe dy pagesa të bëra, njëra në Gjermani, në vlerën e 7050 eurove për parapagimin e tre muajve qera të një banese ku ai kishte strehuar familjen e tij “për shkak të kërcënimeve që kishte marrë”, si dhe një pagesë prej gati 7700 dollarësh të paguara për lindjen e fëmijës së tretë në Shtetet e Bashkuara.
Në mesin e muajit Prill, procesi gjyqësor ndaj zotit Llalla, mori një kthesë, pasi ai hoqi dorë nga gjykimi i shkurtuar, që do t’i lejonte të përfitonte një ulje me një të tretën të dënimit, duke kërkuar zhvillimin normal të procesit në mënyrë që ai të kishte mundësinë e paraqitjes së provave të reja. Por situata e tij nuk ndryshoi dhe mbeti njësoj e rënduar.
Ish Prokurori i Përgjithshëm, por dhe avokati i tij, shmangën komentet pas vendimit të gjykatës. Me gjasë ata pritet t’i drejtohen Apelit, në të kundërt, vendimi i sotëm merr formë të prerë dhe ai do të duhet të shkojë në burg për të vuajtur dënimin.
Zoti Llalla u largua nga detyra në përfundim të mandatit në dhjetor të vitit 2017. Pak muaj më pas, Departamenti amerikan i Shtetit njoftoi se i kishte ndaluar atij dhe familjes së tij, hyrjen në Shtetet e Bashkuara, duke shpjeguar se Sekretari i atëhershëm i Shtetit Rex Tillerson, e miratoi masën e ndalimit për shkak të përfshirjes së ish zyrtarit shqiptar në raste të mëdha korrupsioni.
Një masë e tillë është marrë nga autoritetet amerikane dhe ndaj ish kryebashkiakut të Durrësit Vangjush Dako, deputetit Tom Doshi dhe së fundi, një ditë më parë dhe ndaj ish presidentit dhe ish kryeministrit Sali Berisha./VOA
VAZHDO TË LEXOSH MË TEPËR PËR TEMËN
