Presidenti Ilir Meta përmes një postimi në Facebook ka reaguar për situatën e krijuar në Kosovë, pasi qeveria vendosi që mos të lejonte makinat me targa serbe që të hyjin në vend.
Për Metën ruajtja e sovranitetit shtetëror dhe e integritetit territorial të Republikës së Kosovës është faktor kyç për për ndërtimin e një marrëdhënie të qëndrueshme me Serbinë.
Kreu i shtetit shkruan se të dyja vendet duhet të kapërcejnë tensionet dhe të vijojnë me dialogun dhe t’u përmbahen detyrimeve, që rrjedhin nga marrëveshjet e arritura nga të dy vendet me ndërmjetësimin e BE dhe SHBA.
“Ruajtja e sovranitetit shtetëror dhe e integritetit territorial të Republikës së Kosovës është faktor kyç për konsolidimin e paqes, sigurisë, stabilitetit dhe fqinjësisë së mirë në rajon dhe baza e ndërtimit të marrëdhënieve të qëndrueshme me Serbinë.
Në këtë frymë palët duhet të kapërcejnë tensionet, të vijojnë dialogun dhe t’u përmbahen detyrimeve, që rrjedhin nga marrëveshjet e arritura nga të dy vendet me ndërmjetësimin e BE dhe SHBA”, shkruan Meta.
