Policia e Kosovës ka ndërmarrë një operacion antidrogë dhe ka sekuestruar një sasi marijuane. Detaje të operacionit janë zbardhur sot.
Drejtoria për Hetimin dhe Luftimin e Narkotikëve – Njësia në Prizren dhe Njësia e Ferizajt, gjatë punës operative dhe marrjes se informatave nga burime relevante, dje me urdhër verbal të Prokurorit të Shtetit dhe aprovimin e Gjyqtarit të Procedurës Paraprake, ka realizuar një bastisje në shtëpinë dhe objektet përcjellëse të të dyshuarit me iniciale (K.B.) në fshatin Sallagrazhd, Komuna e Suharekës me dyshimin se në shtëpinë e tij gjendet një sasi e substancave narkotike të llojit marijuanë.
Asistim në këtë operacion kanë ofruar edhe Njësitet për reagim të shpejtë (NJRSh) patrullat policore të stacionit Policor në Suharekë, si dhe kriminalistika rajonale. Sipas detyrës zyrtare janë ftuar edhe dy avokat mbrojtës.
Gjatë bastisjes janë gjetur dhe sekuestruar rreth 10.5 kg marijuanë, peshore dhe mjete të tjera.
Policia njofton se njësitet relevante policore janë duke zhvilluar hetime lidhur me rastin dhe po punojnë “me intensitet te madh në arrestimin e personit të dyshuar që këto momente ndodhet në arrati”.
“Policia e Kosovës është e përkushtuar në parandalimin dhe luftimin e veprave penale në përgjithësi, veçanërisht masa rigoroze ligjore do të aplikohen ndaj personave të përfshirë në përdorim shitje apo abuzim me substanca narkotike”, përfundon njoftimi i policisë.
