I konsideruar si “babai i bombës bërthamore të Pakistanit”, Dr. Abdul Qadeer Khan, ka vdekur në moshën 85-vjeçare pasi u shtrua në spital i infektuar me Covid-19. Khan u përshëndet si një hero kombëtar për transformimin e vendit të tij në fuqinë e parë bërthamore islame në botë.
Sipas BBC, ai ishte gjithashtu famëkeq për kontrabandën e sekreteve bërthamore në shtete, përfshirë Korenë e Veriut dhe Iranin. I njohur si AQ Khan, shkencëtari ishte i rëndësishëm në ngritjen e uzinës së parë të pasurimit bërthamor të Pakistanit në Kahuta pranë Islamabadit. Deri në vitin 1998, vendi kishte kryer testet e para bërthamore.
Kryeministri Imran Khan tha se Pakistani kishte humbur një “ikonë kombëtare”.
“Ai ishte i dashur nga kombi ynë për shkak të kontributit të tij kritik për të na bërë një shtet me armë bërthamore,“- shkroi kryeministri në Twitter.
Duke ardhur menjëherë pas testeve të ngjashme nga India, puna e Dr Khan ndihmoi në vulosjen e vendit të Pakistanit si fuqia e shtatë bërthamore në botë dhe ndezi gëzimin kombëtar. Por ai u arrestua në 2004 për ndarjen e paligjshme të teknologjisë bërthamore me Iranin, Libinë dhe Korenë e Veriut. Zbulimet se ai kishte përcjellë sekretet bërthamore në vende të tjera tronditi Pakistanin.
Dr Khan u fal nga presidenti i atëhershëm i Pakistanit, Pervez Musharraf, por ai u mbajt në arrest shtëpiak deri në vitin 2009. Butësia e trajtimit të tij zemëroi shumë në Perëndim, ku ai u quajt “përhapësi më i madh bërthamor i të gjitha kohërave”. Por në Pakistan ai mbeti një simbol i krenarisë për rolin e tij në rritjen e sigurisë kombëtare.
Fakti që AQ Khan mund të përshkruhet si një nga njerëzit më të rrezikshëm në botë nga spiunët perëndimorë, por gjithashtu të lavdërohet si një hero në atdheun e tij ju tregon shumë jo vetëm për kompleksitetin e vetë njeriut, por edhe se si bota i sheh armët bërthamore.
