Ndër aktoret e shquara shqiptare, në Kosovë, ishte Melihate Ajeti, e cila lindi në Prishtinë, më 9 tetor 1935. Ajo studioi në shkollën e aktrimit në Prishtinë dhe më pas, u specializua në Paris. Melihatja konsiderohej aktorja numër një e teatrit në Prishtinë. Ajo filloi të aktronte kur ishte 16 vjeç, në vitin 1951, në Teatrin Krahinor të Kosovës, duke numëruar mbi 180 role kryesore, përmes të cilae dëshmoi talentin, bukurinë e kapacitetin e madh aktorial.
Loja e saj e jashtëzakonshme në teatër dhe në filmat “Vajza pa pajë”, “Kur pranvera vonohet”, “Trimi”, “Etja”, e bëjnë Melihate Ajetin, primadonë të filmit e të Teatrit Kombëtar të Kosovës.
Në Prishtinë, teatri profesional (sot Teatri Kombëtar) është themeluar përfundimisht më 1948, ndërsa me 1949 ka filluar programi i rregullt, me dy-tri premiera shqip e serbisht – shkruan Sanije Gashi, në “Prishtina e fëmijërisë sime”.
Shfaqja e parë e luajtur në teatrin e Prishtinës është “Personi i dyshimtë” i Nushiqit, e përkthyer. Nushiqi nënën e ka pasur shqiptare, të grabitur prej një serbi të Maqedonisë. Serbët thonë se është serb, maqedonasit se është maqedonas, ne themi se e ka marrë mbiemrin e së ëmës – Nushës, një bareshë e bukur, e re, e rrëmbyer nga kaçakët, – rrëfen Vehap Shita, kritiku më i njohur i teatrit, që nga ditët e para të themelimit të tij, gazetar shumëvjeçar dhe përkthyes.
Lajde Sopi, Meli, Meribane Shala, Katarina Josipi
– Unë, kur kam shkruar për zhvillimin e teatrit, e kam marrë vitin 1930. Edhe atëherë janë dhënë shfaqje teatrale në gjuhën shqipe nëpër shtëpi nëpër oborre, kopshte.. Teatro amatore ka pasur edhe gjatë okupacionit. Në Prizren, për shembull, kanë qenë Tajar Hatipi, Mysafere Gjinali, Nuhi Sherifi, Xhemil Doda…
Në Prishtinë, rolin e parë kryesor e ka luajtur Shani Pallaska, amator i thjeshtë i ardhur nga Gjakova. Shaniu ka kënduar bukur dhe i ka rënë kitarës. Aktorët Abdurrahman Shala e Muharrem Qena kanë ndjekur Shkollën e Teatrit në Beograd, me profesorë shumë të zotët. Fillimisht regjisorët vinin nga Beograd. Muharrem Qena, në fakt, aktrimit ia ka nisur në Mitrovicë, mandej ka ardhur në gjimnazin e Prishtinës, shkruan KultPlus.
E para aktore e Teatrit të Prishtinës ka qenë Meriban Shala, mandej Katarina Josipi, Melihate Ajeti, Musherefe Preka.
Burimi: Sanije Gashi – “Prishtina e fëmijërisë sime”
VAZHDO TË LEXOSH MË TEPËR PËR TEMËN
”Ka qenë ajo ditë, më e vështira për mua…”
”Fadil Paçrami, i dhënë pas dramave i ka lënë punët e Partisë”
”Festivali i butë… i shumë ‘gjinive”
