Gjykata e Posaçme ka kaluar për gjykim dosjen e Gërdecit, ku i pandehur është ish-ministri i Mbrojtjes Fatmir Mediu. Ai akuzohet për dy vepra penale, “Shpërdorim detyre”, një e parashikuar nga Kodi Penal dhe tjetra nga Kodi Penal Ushtarak.
Avokatët mbrojtës kanë kërkuar gjykim të shkurtuar, pasi prokurorët e SPAK që përfaqësojnë dhe akuzën, janë shprehur se dosja ishte e plotë. Mirëpo, avokati i palës akuzuese dhe vetë zonja Zamira Durda, kanë kërkuar që të jenë të pranishëm në seancë, gjë që nuk është pranuar.
Më datë 24 Prill do të jetë seanca e parë e gjyqit dhe do fillojë shqyrtimi në themel i kësaj dosje. Në një deklaratë për mediat, zonja Durda dhe avokati i saj Dorian Matlija, janë shprehur se ata nuk janë pranuar të jenë në proces për të bërë pyetje gjashtë gjyqit.
“Duhet të shkarkohet SPAK-U i gjithë. Do bëjmë ankimim në KLP dhe në KLGJ. Është turp për të gjithë”, u shpreh Zamira Durda, duke paralajmëruar ankimim të vendimit të sotëm për të mos i pranuar ata si palë në gjyq.
Ndërkohë, avokati Matlija u shpreh se sot është bërë një shkelje pasi familjarët e viktimave duhet të ishin pranuar si palë në procesin gjyqësor në ngarkim të Fatmir Mediut, sepse janë ata që kanë bërë kallëzim për ish-ministrin e Mbrojtjes.
“Ky në një mënyrë apo në një tjetër do bëhet me prezencën e familjarëve. E vetmja arsye që mund të kuptohet, sipas prokurorëve, akuza në fjalë nuk ka lidhje me shpërthimin. Sikur nuk ka ndodhur shpërthimi. Nëse është kështu, kanë të drejtë gjyqtarët dhe prokurorët. Në të kundërt, gjyqi duhet të bëhet me praninë e familjarëve.
Këtu është bërë një shkelje e rëndë, është mohuar e drejta e familjarëve për të qenë aty. Ne kemi të gjitha mundësitë e apelimit. Ne mendonim që dosja nuk është e plotë, ka disa mangësira që mund të plotësohen. Më e rëndësishmja është që ky proces të jetë me praninë e familjarëve”, u shpreh avokati Dorian Matlija.
VAZHDO TË LEXOSH MË TEPËR PËR TEMËN
