Rëndohet bilanci i ngjarjes së rëndë në Burgun e Peqinit, pasi një prej të plagosurve ka ndërruar jetë.
Sokol Mjaçaj ka qëlluar me pistoletë ndaj dy të dënuarve të tjerë Ilir Xhakja dhe Arben Lleshi. Mësohet se të dy mbetën të plagosur rëndë, por më pas Lleshi ka ndërruar jetë për shkak të plagëve të marra. Dyshohet se arma është futur me dron dhe ka dyshime se Mjacaj është porositur nga jashtë për të kryer ekzekutimin.
Arben Lleshi ka një të shkuar të gjatë kriminale. Ai u ekstradua në vitin 2016 nga Britani, ku ishte dënuar me 32 vite burg për vrasjen e një bashkatdhetari, ngjarje e ndodhur disa vite më parë.
Ai është autori i vrasjes së Agim Hoxhës, në 10 prill 2012. Mediat britanike shkruanin atëherë se Hoxha u vra në një apartament në qytetin anglez të Southempton, dhe më pas, trupi i tij u dogj në një makinë tip “Mercedes Benz”.
Për këtë ngjarje është dënuar me burg edhe vëllai i Lleshit, 39-vjeçari Afrim Lleshi, i cili ka pranuar para gjykatës se ka bashkëpunuar në shfarosjen e trupit të viktimës.
