Këto medikamente janë identifikuar në kërkime të mëparshme si potencialisht të dëmshme për mikrobiomën e zorrëve, duke ngjallur shqetësime për efektet e mundshme afatgjata në tru.
Megjithatë, një studim amerikan tregon se te të moshuarit e shëndetshëm, përdorimi i antibiotikëve nuk është i lidhur me një rrezik të shtuar të dëmtimit të aftësive mendore apo të demencës.
Dëmtimi i aftësive mendore i referohet ndryshimeve të lehta në të menduar dhe kujtesë, si harrimi i ngjarjeve ose humbja e sendeve shpesh. Ndërsa demenca paraqet një gjendje më të avancuar ku problemet me të menduarin dhe kujtesën ndikojnë në aftësinë e një personi për të kryer detyrat e përditshme.
Autori i studimit, profesori Andrew Chan nga Shkolla Mjekësore e Harvardit, tha:
“Sipas kërkimeve të mëparshme, antibiotikë mund të prishin mikrobiomën e zorrëve, e cila është një bashkësi mikroorganizmash që jetojnë në zorrët tona dhe ndihmojnë tretjen.
“Për shkak se mikrobioma e zorrëve konsiderohet e rëndësishme për ruajtjen e shëndetit të përgjithshëm, dhe ndoshta edhe të funksionit mendor, kishte shqetësime se antibiotikët mund të kenë një ndikim të dëmshëm afatgjatë në tru.
“Duke qenë se të moshuarit marrin më shpesh antibiotikë dhe janë më të rrezikuar për rënie të aftësive mendore, këto gjetje ofrojnë qetësim për përdorimin e këtyre medikamenteve.”
Studimi, i publikuar në internet nga revista Neurology, përfshiu 13,571 njerëz të shëndetshëm mbi moshën 70 vjeç.
Hulumtuesit i përcaktuan si të shëndetshëm ata që nuk kishin sëmundje zemre, demencë, aftësi të kufizuara serioze fizike apo ndonjë problem shëndetësor që mund të shkurtonte jetëgjatësinë e tyre nën pesë vjet.
Të gjithë pjesëmarrësit ishin të lirë nga dëmtimi i aftësive mendore dhe demenca gjatë dy viteve të para të studimit.
Gjatë kësaj kohe, ekipi i hulumtuesve përcaktoi përdorimin e antibiotikëve nga pjesëmarrësit duke shqyrtuar të dhënat e recetave.
Pak më pak se dy të tretat e pjesëmarrësve (63%) përdorën antibiotikë të paktën një herë gjatë kësaj kohe.
Pjesëmarrësit u ndanë në dy grupe: ata që përdorën antibiotikë dhe ata që nuk kishin përdorur antibiotikë.
Hulumtuesit gjithashtu i ndanë ata në grupe bazuar në numrin e recetave për antibiotikë gjatë dy viteve të para, nga zero deri në pesë ose më shumë receta, për të shqyrtuar nëse më shumë antibiotikë rrisnin rrezikun e dikujt.
Pjesëmarrësit u ndoqën për një mesatare prej pesë vjetësh të tjera, gjatë të cilave 461 persona zhvilluan demencë dhe 2,576 persona pësuan dëmtim të aftësive mendore.
Më pas, studiuesit analizuan nëse përdorimi i antibiotikëve gjatë dy viteve të para ishte i lidhur me ndryshimet në kohë në aftësitë mendore dhe kujtesën.
Pjesëmarrësit i nënshtroheshin serive të testeve mendore në fillim të studimit, pas një viti, dhe më pas çdo dy vjet.
Testet matnin aftësitë mendore si vëmendja, funksionet ekzekutive dhe gjuha.
Ekipi i hulumtuesve analizoi rezultatet dhe krahasoi njerëzit që kishin marrë antibiotikë me ata që nuk kishin marrë. Ata nuk gjetën ndonjë ndryshim midis të dy grupeve.
Pas përshtatjes për faktorë si historia familjare e demencës, funksioni mendor në fillim të studimit dhe medikamentet që dihet se ndikojnë në njohje, ekipi zbuloi se përdorimi i antibiotikëve nuk ishte i lidhur me rreziqe të shtuara për dëmtim të aftësive mendore ose demencë krahasuar me mos përdorimin e medikamenteve.
Hulumtuesit gjithashtu nuk gjetën ndonjë lidhje me përdorimin kumulativ të antibiotikëve, përdorimin e vazhdueshëm apo lloje të veçanta antibiotikësh.
Chan thotë se nevojiten studime më të gjata pasi pjesëmarrësit u ndoqën vetëm për një periudhë relativisht të shkurtër kohore. / Talker News
VAZHDO TË LEXOSH MË TEPËR PËR TEMËN
