Edhe pse janë të interesuar që sa më parë të shpërbëjnë Kuvendin e Kosovës, Lidhja Demokratike e Kosovës (LDK) dhe Lëvizja Vetëvendosje (LVV) ende nuk i kanë votat për rrëzimin e Qeverisë, por opozita paralajmëron se do të kërkojë seancë të jashtëzakonshme.
Shefi i Grupit Parlamentar të LDK-së, Avdullah Hoti, ka bërë të ditur se sot do të paraqesin një kërkesë të tillë për të miratuar Rezolutën e 4 shtatorit, e cila ia pamundëson presidentit Hashim Thaçi që të diskutojë për kufijtë në dialogun me Serbinë.
Ai foli edhe për takimin e shumëpërfolur që pritet të mbahet më 11 nëntor në Paris në mes të Thaçit dhe presidentit serb, Aleksandar Vuçiq.
“Ne nuk mund të lejojmë që një person i vetëm të marrë në dorë fatin e Kosovës dhe të vendosë ashtu siç i teket atij. Janë 120 deputetë të Kuvendit të Kosovës. Askush, asnjë nuk e gjen të gatshëm që të mbështesë idenë e tij. Ai donë ta çojë këtë përpara. Ne duhet të mblidhemi dhe t’i themi këtij personi stop përmes një rezolute të thjesht, me një pikë, ku thuhet se çështja e dialogut nuk mund të jetë çështje e dialogut me Serbinë”, tha Hoti.
Për mundësinë e zgjedhjeve të parakohshme, ka folur edhe deputetja e LVV-së, Albulena Haxhiu.
“Në këtë drejtim ne konsiderojmë se duhet të kemi qasje serioze dhe të kemi 61 votat. Votat e Vetëvendosjes, 19 prej tyre janë të gjitha, ato i kemi të gatshme. Vetëm duhet të sigurohemi që i kemi edhe 4 apo 5 sa na duhen”, tha Haxhiu. /Konica.al/
VAZHDO TË LEXOSH MË TEPËR PËR TEMËN
‘Kosova, pengesa më e madhe për Serbinë në rrugën drejt BE-së’
‘Kosova nuk është kushti i vetëm’
