Teatri në Tiranë për sezonin e ri artistik është më i gjallë se asnjëherë më parë. Pas suksesit të Festivalit mbarëkombëtar të Teatrit ku morën pjesë plot 14 trupa teatrore nga të gjitha trevat shqipfolëse e ku triumfoi Teatri Shqiptar i Shkupit me shfaqjen “Vdekja e Dantonit”, një tjetër festival do të zhvillohet nga Teatri Metropol.
Teatri Metropol nën moton “Drama shqipe si laborator njohjeje dhe kërkimi” e mbi të gjitha një mënyrë për të na bashkuar të gjithëve, do të zhvillojë Festivalin “Metrofest 2”.
“Metrofest 2” do të zhvillohet në Teatrin Metropol në datat 03-07 dhe 10-14 Tetor 2018. Qëllim kryesor i këtij festivali është rigjallërimi i teksteve dramatike nga arkiva e dramës shqipe bazuar në një rrugëtim zbulimesh të reja të shprehive skenike.
Teatri Metropol ka si udhëheqje në veprimtarinë e tij objektivin: më shumë qasje në kulturë nga më shumë njerëz, nga të gjithë qytetarët, edhe ata që janë të përjashtuar ose ndihen të përjashtuar nga arsyet e aftësisë financiare, prejardhjes sociale ose prejardhjes kulturore dhe këtij objektivi i takojnë edhe iniciativa të dobishme si kjo, që bashkojnë dhe lidhin hallka të një zinxhiri njerëzor për një komunitet të fuqishëm.
Çfarë është teatri dhe raporti i tij me publikun, janë çështje që kanë shqetësuar artistët ndër breza, ndaj ky festival i ardhur si pretekst për njohje dhe krijim, i fton spektatorët e kryeqytetit të zbulojnë së bashku shtigje dhe përgjigje.
I bazuar vetëm në fondin e dramave shqipe pjesët të cilat do të ngjiten në skenë janë të autorëve të mirënjohur shqiptarë. Veprat do të jenë: ‘Kryet e Hudhrës’ nga Krist Berisha; ‘Rrajët lëvizin’ nga Ernest Koliqi; ‘E mbesa e krahinarit’ nga Kristo Floqi; ‘Makaronat e shejtanit’ nga Lazër Lumezi; ‘Prangat’ nga Halil Laze.
“Metrofest 2” synon të kthehet në traditë për teatrin shqiptar si manifest për shpalosjen e vlerave të dramës shqipe.
VAZHDO TË LEXOSH MË TEPËR PËR TEMËN
“Vdekja e Dantonit” triumfon në FMT
