Kreu i Shoqatës Turistike të Biznesmenëve të Shërbimeve të Turizmit (MOBILSIAD), Kerem Alkin, ka deklaruar se gjatë vitit 2020 kompanitë dhe familjet në mbarë botën mund të pësojnë humbje me vlerë prej 6 trilionë dollarë për shkak të sulmeve kibernetike.
Duke folur për Anadolu Agency, Alkin thotë se gjatë vitit 2015 bota humbi 3 trilionë dollarë për shkak të sulmeve kibernetike dhe se këto humbje financiare parashikohet të arrijnë 3.5 trilionë dollarë për vitin e kaluar.
Ai theksoi se në vitin 2020, shpenzimet kibernetike të sigurisë në botë, të cilat aktualisht janë rreth 100 miliardë dollarë, do të arrijnë po ashtu në 1 trilion dollarë. “Në vitin 2020, numri i pajisjeve të zgjuara do të arrijë në 200 miliardë dhe njerëzit do të përdorin 300 miliardë fjalëkalime për çdo ditë të jetës”, tha Alkin.
Siç bëri të ditur ai, mes viteve 2015 dhe 2017 mesatarisht një kompani iu ekspozua sulmit kibernetik për haraç në çdo 40 sekonda dhe kjo shkallë pritet të arrijë në çdo 14 sekonda. “Organizatat e paligjshme kthehen drejt sulmeve kibernetike për shkak të fitimit të lartë dhe kostos së ulët”, theksoi ai.
Duke iu referuar çështjes së softuerit keqdashës “ransomware”, ai tha se vitin e kaluar organizatat e paligjshme fituan 5 miliardë dollarë nga sulmet për haraç në të gjithë botën. Ransomware është lloj i virusit malware, i cili bllokon ose kufizon përdorimin e pajisjes hard drive të kompjuterit derisa të paguhet një shpërblim për një organizatë të paligjshme.
