Presidenti amerikan Donald Trump vendosi sanksione javën e kaluar për gazsjellësin Nord Stream 2 të projektuar nga Moska për të shmangur Ukrainën dhe për të rritur furnizimet e gazit përmes Detit Balltik drejt Gjermanisë, konsumatori më i madh i energjisë në Rusi.
Shtetet e Bashkuara dëshirojnë të shesin më shumë gaz në Evropë dhe kanë thënë se tubacioni do ta bënte kontinentin shumë të varur nga Rusia, e cila është në konflikt me Uashingtonin për një seri çështjesh, përfshirë ndërhyrjen e Moskës në Ukrainë.
Berlini pret që sanksionet amerikane të vonojnë paksa Nord Stream 2
Sanksionet e SHBA-së ka të ngjarë të vonojnë përfundimin e projektit nga disa muaj deri në gjysmën e dytë të vitit 2020, tha një zyrtar i lartë gjerman të hënën (23 dhjetor).
Kryeministri rus Dmitry Medvedev, megjithatë, tha të hënën (23 dhjetor) se tubacioni do të përfundonte brenda disa muajsh.
Çfarë është Nord Stream?
Nord Stream 1 ka furnizuar Evropën me gazin rus që nga viti 2011.
Ndërtimi i Nord Steam 2 filloi në vitin 2018. Edhe ai do të ketë tubacione me një gjatësi të kombinuar prej 2.460 km dhe kapacitet 55 bcm, mjaftueshëm për të siguruar energji për 26 milion familje.
Nord Stream 2 ka dritën jeshile nga të gjitha vendet evropiane.
Para se Uashingtoni të njoftonte sanksionet ndaj kompanive që ndërtojnë Nord Stream 2, zyrtarët rusë kishin thënë se do të mbaronte rreth mesit të vitit 2020.
Si mund ta përfundojë Rusia projektin?
Në vitin 2016, Gazprom bleu një anije të veçantë për hedhjen e tubave të quajtur Academic Cherskiy për t’u përdorur si mjeti i fundit nëse kompanitë evropiane ndaluan së punuari në Nord Stream 2.
Rusia ka një anije tjetër, Fortuna, e cila ndërtoi 13 kilometrat e parë të tubacionit në ujërat e cekëta në brigjet e Detit Baltik të Rusisë. Sipas pronarit të saj, anija është në gjendje të shtrojë tuba në thellësi deri në 200 metra.
Sa do të zgjasë?
Medvedev tha se do t’i duheshin Rusisë edhe disa muaj për të përfunduar projektin, duke shtuar se ai nuk shihte asgjë “katastrofike” në sanksione pasi Moska dhe Kievi sapo kishin rënë dakord një marrëveshje të re pesë-vjeçare të tranzitit për të dërguar gaz në Evropë përmes Ukrainës.
Gazprom nuk pranoi të komentojë se si planifikon të përfundojë tubacionin.
Përkthyer dhe përshtatur nga BBC/ konica.al
VAZHDO TË LEXOSH MË TEPËR PËR TEMËN
Gazsjellësi Nord Stream 2, tani edhe Franca kundër Gjermanisë
Gazsjellësi rus Nord Stream 2/ Pse BE po e ngadalëson projektin?
Gazsjellësi Nord Stream 2/ SHBA kërcënon Gjermaninë
