Makinat-retro parakaluan në Durrës, nëpër sheshe dhe rrugë të qytetit bregdetar. Automjetet e vjetra të viteve ’40-’80, u shfaqën kështu, para qytetarëve dhe shumë plazhistësh e turistësh, nën tingujt e muzikës.
Rrallë të ndodh të shohësh rrugës, automjete që kanë shënjuar historinë. Durrësakët e kanë pasur këtë mundësi fundjavës, kur mu para shtëpive të tyre parakaluan makinat e viteve ’40-’80. Për nostalgjikët, por jo vetëm, kjo është një festë dhe atmosferë ndryshe.
Parada Retro solli në Durrës, 48 automjete, të ruajtura dhe mirëmbajtura nga koleksionistë të mbarë vendit.
Drejtoria e Përgjithshme e Shërbimeve të Transportit Rrugor në bashkëpunim me bashkinë e Durrësit, si dhe me “Heminguei fan club Albania” menduan të krijojnë pak gjallëri në këtë sezon të zymtë për qytetin më të madh bregdetar.
Automjetet, fillimisht u vendosën në sheshin kryesor të qytetit, duke tërhequr qindra qytetarë dhe turistë, të cilët nuk ngurruan t’i kishin këto momente në fotografi.
Janë automobilë të markave: “Ford”, “Benz”, “Chevrolete”, “Fiat”, “Roll Roys”, nga vitet ’40-’80.
Si “mbretëresha e paradës” u cilësua “Skoda”, prodhim i vitit ’80, në pronësi të të apasionuarit nga Kukësi, Rrahim Meçka. Ky lloj automjeti ka mbajtur peshën kryesore të transportit në vend, përgjatë viteve ’80-të. Ndaj u zgjodh për të kryesuar paradën nëpër rrugët e Durrësit.
“I biri i shoferit të këtij automjeti e ka marrë në gjendje thuajse të shkatërruar, e ka rindërtuar siç e mbante i ati në kohën kur bënte rrugën e Qafë- Malit, para viteve ’90-të”, – tha koleksionisti Meçka
Ina Haveri, tha se ky event organizohet për herë të parë në Durrës, fill pas Tiranës, për t’i dhënë gjallëri qytetit të goditur rëndë nga tërmeti i 29 nëntorit 2019.
“Eventi është konceptuar me paradën që e drejton skoda dhe ndiqet nga makinat e tjera retro”, – tha Haveri, zëdhënëse pranë Drejtorisë së Transportit.
Ndërsa përfaqësuesi i bashkisë, Adrian Gurra, tha se “po mendojmë aktivitete pa grumbullime masive, për t’u ruajtur nga covid-19”. Më pas, parada vijoi deri në “Plepa”. Muzika e përzgjedhur nga anëtarët e “Hemingueit”, ishte bashkëshoqëruesja e Paradës Retro.
VAZHDO TË LEXOSH MË TEPËR PËR TEMËN
