Edi Rama, Aleksandar Vuçiçi dhe Dimitar Kovaçevskit, 3 liderët e vendeve që janë pjesë e “Open Balkan”, do të jenë bashkë për në samitin e radhës të 7 dhe 8 qershorit në Ohër.
Pas tre vitesh nga krijimi, nismës “Ballkani i Hapur” do t’i bashkohet edhe Mali i Zi. Kryeministri i Malit të Zi, Dritan Abazoviç konfirmoi pjesëmarrjen, por ai do të jetë ashtu si dhe Presidenti Gjykanoviç në samitin e Tiranës në 2019 thjeshtë në rolin e vëzhguesit, pasi Mali i Zi ende nuk e ka marrë zyrtarisht vendimin për t’iu bashkuar “Ballkanit të Hapur”.
Ai është kritikuar nga një pjesë e publikut në vendin e tij për shkak se nuk e përjashton mundësinë e anëtarësimit të Malit të Zi në “Ballkanin e Hapur”, një nismë e nisur në vitin 2019, e cila deri më sot, pavarësisht se ka mbështetjen e BE-së, si dhe të administratës së mëparshme dhe asaj aktuale të SHBA-së, nuk arriti të zgjerohej. Samitit do i bashkohet dhe Kryeministri i Bosnjës, Zoran Tegeltija. E vetmja që ka refuzuar ftesën për të qenë pjesë e kësaj tryeze rajonale të Ballkanit Perëndimor është Kosova.
Kryeministri kosovar Albin Kurti i ka kthyer një përgjigje negative ftesës së bërë nga homologu i Maqedonisë së Veriut Dimitar Kovaçevski. Të mërkurën e tetë qershorit në Ohër, përveç diskutimeve do të nënshkruhen edhe 4 marrëveshje si pjesë e bashkëpunimit 3 palësh ku më e rëndësishmja dhe e premtuar në takimin e fundit në Tiranë, ishte heqja e barrierave tarifore për disa nga produktet e eksportit dhe importit mes tri vendeve.
“Dispozitat e këtij dokumenti nuk do të rezultojnë në vendime apo veprimtari të veçanta që janë të detyrueshme dhe të imponuara për asnjë palë apo palë të tretë”, thuhet në memorandumin e bashkëpunimit.
Ndër të tjera, gjithsej tetë nene të marrëveshjes theksojnë nevojën për punë të përbashkët për të inkurajuar përmbushjen e detyrimeve tatimore në të tri vendet dhe se secila palë mund të caktojë një person për të koordinuar aktivitetet në emër të saj. Gjithashtu, secila palë i paguan shpenzimet e veta për zbatimin e Memorandumit.
Rama, Vuçiç dhe Kovaçeski do të firmosin edhe tri marrëveshjet e tjera lidhen me njohjen e ndërsjellë të diplomave të studentëve, si dhe bashkëpunim ne sektorët e turizmit dhe atë të kulturës.
Në asnjërën prej katër dokumenteve të planifikuara nuk përmendet zgjerimi, por u drejtohet ftesa shteteve tjera të interesuara të bashkëpunojnë në të ardhmen. Samitit do t’i bashkohet virtualisht dhe komisioneri për zgjerimin i BE-së, Oliver Varheily, i cili e ka shprehur hapur mbështetjen për këtë nisme rajonale, por kërkon që ajo të zgjerohet dhe me 3 shtetet e tjera.
Tre nismëtarët, Edi Rama, Kryeministri i Shqipërisë, Aleksandar Vuçiç, Presidenti i Serbisë dhe Zoran Zaev, ish-Kryeministri i Maqedonisë së Veriut, e ideuan këtë koncept me qëllim të krijimit të një zone të lëvizjes së lirë të njerëzve, mallrave dhe shërbimeve në Ballkanin Perëndimor.
Takimi i katër liderëve i paraprin vizitës zyrtare të kancelarit gjerman Olaf Sholz në disa nga vendet e Ballkanit Perëndimor, e konkretisht në Serbi, Kosovë dhe Maqedoninë e Veriut.
Në vizitën që Kryeministri Edi Rama kreu në Gjermani, Olaf Sholz e bëri të qartë se për Gjermaninë ekziston vetëm Procesi i Berlinit, për të cilin deklaroi se do ta rijetësojë. Po aq edhe qëndrimi i BEsë dhe SHBA-së mbetet i pandryshuar, një nismë ku të jenë të përfshirë të gjithë vendet e Ballkanit Perëndimor.
MARRËVESHJET QË DO NËNSHKRUHEN NESËR NË OHËR
KUNDËR EVAZIONIT FISKAL
Në tekstin e Memorandumit që ka të bëj me taksat, thuhet se nënshkruesit kanë parasysh “rëndësinë e shtuar” të bashkëpunimit në luftën kundër evazionit fiskal, gjegjësisht, shmangies së pagesës së tatimit.
NJOHJA RECIPROKE E DIPLOMAVE
Në tekstin e Marrëveshjes së paraparë në fushën e njohjes reciproke të diplomave, iniciativa mbron përshpejtimin e procedurave për njohjen e diplomave të arsimit të lartë ndërmjet Serbisë, Shqipërisë dhe MV-së. Marrëveshja me shtatë nene i referohet kualifikimeve të nivelit e pestë (arsimi i lartë), si dhe niveleve gjashtë deri në tetë të Kornizës Evropiane të Kualifikimeve. SHKËMBIMI KULTUROR Për të promovuar shumëllojshmërinë kulturore, dialogun ndërkulturor dhe mirëkuptimin e ndërsjellë, të tri palët synojnë të nënshkruajnë një Memorandum mirëkuptimi për bashkëpunimin kulturor në BP. Në shtatë nenet e Memorandumit, nënshkruesit angazhohen për të inkurajuar lëvizshmërinë e punonjësve të kulturës dhe thellimin e bashkëpunimit institucional.
HARTA KULTURORE
Në Memorandumin e mirëkuptimit në fushën e turizmit në BP, parasheh formimin e një harte turistike të quajtur “Ballkani i Hapur”. Shtetet nënshkruese janë të detyruara të inkurajojnë kontaktet ndërmjet organizatave të tyre turistike dhe punëtorëve, si dhe parashikohet krijimi i grupeve të posaçme të punës për këtë fushë.
VAZHDO TË LEXOSH MË TEPËR PËR TEMËN
Abazoviç: …Mali i Zi nuk pajtohet me iniciativën
Mesazhi i Abazoviç: Mos të merremi me punë të kota, por…
Le Monde: Në Ballkan bandat janë në zemër të sistemit shtetëror
