Mbrëmjen e djeshme në skenën e Universitetit të Arteve dhe në e skenën “arTurbinës”, në kuadër të Festivalit Mbarëkombëtar të Teatrit, u ngjitën respektivisht trupa e Teatrit “Zihni Sako” të Gjirokastrës dhe trupa e Teatrit “Metropol”. Në skenën e UA me fillim nga ora 18:00 u shfaq tragjedia “Pirro”, ndërsa në skenën “arTurbina” me fillim nga ora 21:00 u shfaq komedia “Qiell i heshtur“.
Drama “Pirro”, erdhi në skenë me regji të Ilir Llurit, e me aktorët Delvis Bejleri, Myzafer Zilfa, Seljana Dalipaj, Dori Çaushi, Kudret Alikaj, Aleksandër Kondi.
Në tragjedinë “Pirro” të shkruar nga Et’hem Haxhiademi trajtohet tema e luftës për pushtet. Pirro kthehet në Epir nga Iliria për të trashëguar fronin e lënë nga babai i tij, Eakidi. Ndërkohë, në pushtet është ngjitur Neoptolemi. Intensiteti i ngjarjeve dhe fakteve duket se i japin përgjigje pyetjes që ngrihet që në fillim të tragjedisë: A mund të mbretërojnë dy mbretër në të njëjtin fron?
Komedia “Qiell i heshtur”, erdhi në skenë me regji të Armela Demaj dhe nën interpretimin e aktorëve Armela Demaj, Jonida Beqo, Sonila Kapidani, Shkëlzen Berisha, Verjana Abazaj.
“Qiell i heshtur” e shkruar nga autorja Lauren Gunderson paraqet historinë e Henrietta Leavitt, një personazh brilant i shekullit të XX e cila arriti që të bëhej pjesë e departamentit të Astronomisë së Harvardit në një kohë kur gratë ishin të privuara nga degë të tilla studimi.Gunderson e shpalos këtë histori nën një petk poetik duke ekzaminuar jetën e kësaj gruaje të mrekullueshme.
“Pirro” dhe “Qiell i heshtur” ishin shfaqjet gjashtë dhe shtatë në radhë për Festivalin Mbarëkombëtar të Teatrit.
Ditën e pestë, me fillim nga ora 18.00 në skenën e Teatrit Eksperimental do të ngjitet në skenë “Medea”, produksion i Teatrit Kombëtar Eksperimental “Kujtim Spahivogli”, me autor Euripidin dhe regji të Dimitris Mylonas. Me fillim nga ora 21.00 do të shfaqet “Nana”, produksion i Teatrit “Teuta” të Ulqinit, me autore Arlinda Morina dhe regji të Munib Abazoviq në skenën “arTurbina”.
VAZHDO TË LEXOSH MË TEPËR PËR TEMËN
“Senatori Fox”, përtej fasadës dhe intrigave të pushtetit
“Dy duzina me trëndafila”, kur martesa shkon për dreq
