Ministri i Infrastrukturës dhe Energjisë, Damian Gjiknuri është përfshirë mbrëmjen e sotme nga protestat e banorëve të Unazës së Re.
Kjo protestë sipas komentit të ministrit Gjiknuri, ka shtysë politike. Ai u shpreh se e rëndësishme është që të gjendet një zgjidhje.
“Mund të jetë edhe e organizuar. Jam i bindur që ka edhe shtysë politike. Janë presione që nuk të çojnë asgjëkund. Ajo që duhet të bëjmë është të gjejmë një zgjidhje”, tha Gjiknuri.
Pronarët e banesave që preken nga ndërtimi i Unazës së Re, të cilët prej ditësh protestojnë duke bllokuar rrugën, e zhvendosën protestën e tyre mbrëmjen e sotme përballë ambienteve të Top Channel, ku ishte i ftuar ministri i Infrastrukturës dhe Energjisë, Damian Gjiknuri.
Banorët, me pankarta në duar, kërkojnë dëmshpërblim.
Ndërtimi i Unazës së Re prek të paktën 300 ndërtimet, një pjesë e të cilave të palegalizuara.
Burime nga vendngjarja thanë se, ministri Gjiknuri u fut në ambientet e televizionit nga hyrja dytësore.
Nga ana tjetër, lidhur me këtë vendim, kreu i opozitës, Lulzim Basha,e konsideron si të padrejtë shembjen e banesave që preken nga ndërtimi i Unazës së Re në Tiranë.
“Ka një ligj shpronësimi. Vlerëson pronat, paguan paratë. Jepet një kohë për të blerë një banesë të re. Si mund të shkosh në mes të natës dhe t’i nxjerrësh nga shtëpia?
Pa ju dhënë një lek dëmshpërblim. Thjesht duke ju vënë një kryq tek dera e shtëpisë. Është e dhimbshme që të themi siç e përshkruani ju. Janë 317 familje.
Si do të vinte ty sikur të ishte i afërmi yt? Nëse nuk e kuptoni se ku kemi ardhur, pa Gjykatë Kushtetuese, me prokurori të kapur dhe një kryeministër që ju vë kryq shtëpive, ju them hapni gojën.”
VAZHDO TË LEXOSH MË TEPËR PËR TEMËN
