Ministri serb i Mbrojtjes, Aleksandar Vulin, tha se e vetmja mënyrë që Serbia ta njohë Kosovën është që të rrëzohet presidenti Aleksandar Vuçiç dhe ai të zëvendësohet me ndonjë president të dëgjueshëm.
“Kryeministri i Kosovës, Ramush Haradinaj dhe ata të bashkësisë ndërkombëtare që e lejojnë të vendosë taksat dhe të shkel Marrëveshjen e Stabilizim-Asociimit dhe CEFTA-së e dinë këtë. Prandaj, aplikimi i taksës dhe demonstrimi i forcës ndaj serbëve në Mitrovicë është pjesë e një aksioni të njëjtë, i cili ka për qëllim rrëzimin e Vuçiçit në radhë të parë, si një parakusht i domosdoshëm për njohjen e Kosovës unike në tërësinë e saj të plotë territoriale”, tha Vulin, përmes një komunikate për shtyp.
Siç raportojnë mediat serbe, Vulin potencoi se derisa Vuçiç e udhëheq Serbinë, ideja për një Kosovë të pavarur do të pësojë humbje dhe këtë nuk do t’ia falin fuqitë e mëdha.
Reagimi i ministrit serb vjen pas deklaratës së kryeministrit të Kosovës, Ramush Haradinaj, i cila ka thënë se taksa doganore prej 100 për qind për mallrat nga Serbia nuk do të shfuqizohet derisa Serbia të njohë pavarësinë e Kosovës. /Konica.al/
VAZHDO TË LEXOSH MË TEPËR PËR TEMËN
‘Nuk e njohim Kosovën, nuk i ndryshojmë kufijtë’
“Larg duart nga Kosova e kosovarëve!”
