Komisioni për Çështjet Ligjore, Administratën Publike dhe të Drejtat e Njeriut gjatë mbledhjes së ditës së sotme shqyrtoi projektligjin “Për rivlerësimin e pasurisë së paluajtshme”.
“Thelbi i këtij projektligji është t’u japë një mundësi qytetarëve për të rivlerësuar pasuritë e patundshme, pronën e tyre me vlerën historike prej 3%. Komisioni për Ekonominë dhe Financat ka propozuar që kjo vlerë të ulet në 2%.
Ky projektligj do t’u japë mundësinë rreth 60 mijë familjeve të përfitojnë dhe gjithashtu është edhe një përfitim për buxhetin e shtetit. Mendojmë që për t’u ardhur në ndihmë qytetarëve tanë por edhe grupeve të interesit, shtrirja e periudhës së rivlerësimit të jetë 30 gusht 2020 po edhe mundësia e zgjatjes së kësaj periudhe deri më 30 shtator 2020 është një tjetër propozim në mënyrë që të përfitojnë edhe emigrantët të cilët gjatë kësaj periudhe kthehen në shtëpitë e tyre. 
Mendoj që ky projektligj duhet të prekë edhe qytetarët që janë në proces legalizimi por kjo i takon ligjvënësit të vendosë”– u shpreh Ahmetaj.
“Ky propozim është një risi pozitive për shtimin e të ardhurave duke pasur parasysh faktin se edhe në të shkuarën ky projektligj ka pasur një interes të madh së pari nga qytetarët por edhe për buxhetin e shtetit. Ky projektligj është i domosdoshëm e duhet të realizohet”– tha relatori i këtij projektligji, Bashkim Fino.
Pas diskutimeve anëtarët e komisionit miratuan në parim, nen për nen dhe në tërësi projektligjin “Për rivlerësimin e pasurisë së paluajtshme” e vendosën t’ia përcjellin atë komisionit përgjegjës dhe seancës plenare.
VAZHDO TË LEXOSH MË TEPËR PËR TEMËN
Cili është plani për banorët me shtëpi të palegalizuara?
Miratohen 1600 bonuse qeraje në Tiranë dhe Durrës
