Marrja nën kontroll e një tjetër gjiganti të mediave sociale nga një miliarder i vetëm po alarmon qeveritë, studiuesit dhe grupet e të drejtave të njeriut të cilat janë të shqetësuara për sasinë e të dhënave që do t’i lejojë Elon Musk-ut të blejë në Twitter dhe sa larg do ta çojë ai lirinë e fjalës që ka premtuar.
“Fjala e lirë është baza e një demokracie funksionale dhe Twitter është sheshi dixhital i qytetit ku debatohen çështjet jetike për të ardhmen e njerëzimit,” tha Musk në një deklaratë teksa njoftoi arritjen e marrëveshjes së blerjes së Twitter të hënën.
Liria e fjalës është një ide e mirë në parim, por në mediat sociale, ajo nuk funksionon në të njëjtën mënyrë.
Twitter dhe kompani të tjera të mediave sociale gjatë disa viteve të fundit e kanë marrë më seriozisht përhapjen e dezinformatave dhe thirrjeve për dhunë.
Twitter, për shembull, e ndaloi përgjithmonë ish-presidentin amerikan Donald Trump nga platforma për përhapje të informacioneve të rreme dhe pasi e fajësoi për nxitjen e trazirave të janarit 2021 në Capitol Hill. Tani u rrit frika se Musk mund ta rikthejë Trumpin përsëri në Twitter.
“Ne përgjithësisht jemi të shqetësuar që një “absolutist i lirisë së fjalës”, merr përsipër një nga platformat që përdoren më gjerësisht nga mbrojtësit e të drejtave të njeriut, gazetarët dhe aktivistët për të ndjekur qëllimet e tyre,” tha Diego Naranjo, Shef i Politikave në shoqatën për të Drejtat Dixhitale Evropiane.
“Përqendrimi i pasurisë dhe pushtetit në pak duar është gjithmonë armiku i demokracisë, dhe fakti që një nga njerëzit më të pasur në planet merr Twitter duhet t’i vërë të gjithë në ruajtje dhe të përshpejtojë alternativat ndaj bizneseve të mëdha aktuale të teknologjisë dominuese si Twitter”, tha ai për Euronews Next.
Përfitimi nga të dhënat e përdoruesve të Twitter
Përveç dëshirës për të zbatuar vizionin e tij që Twitter të bëhet një platformë e fjalës së lirë, çfarëdo që të thotë kjo, Musk mund të dëshirojë gjithashtu që Twitter të ndihmojë në tregëtimin e kompanive të tjera të tij.
Përdoruesit e mediave sociale janë në mëshirën e algoritmeve, të cilët nxjerrin të dhëna për përdoruesit dhe më pas përdorin informacionin për t’i mbajtur ata në faqe për aq kohë sa të jetë e mundur, duke i bërë faqet e mediave sociale të fitojnë më shumë para përmes reklamave.
“Ne duhet të kemi akses në algoritmet që përdorin platformat në mënyrë që të jemi në gjendje të kuptojmë se si funksionojnë platformat,” tha Naranjo, i cili bën thirrje për ndalimin e këtij modeli biznesi dhe u kërkon kompanive “të shtyhen për të gjetur një mënyrë tjetër për të marrë fitim që është jo bazuar në mbikëqyrjen 24/7 në thelb të çdo individi të lidhur në internet”.
Musk, CEO i Tesla, SpaceX dhe Neuralink, mund të përdorë të dhënat nga algoritmet e Twitter për të tregtuar kompanitë e tij.
“Musk po hyn në një treg që ka fuqi të madhe për sa i përket algoritmeve që ai mund të përdorë dhe të përdorë të dhënat pasi dëshiron të ndikojë në treg për kompanitë e tij Tesla dhe SpaceX”, tha Petros Iosifidis, profesor i medias dhe politikave të komunikimit.
Ai tha për Euronews Next se platforma do të jetë një “mjet i madh marketingu” për kompanitë e tij të tjera.
“Çdo kompani individuale si Meta ka fuqinë të mbledhë të dhëna për individët nëpërmjet algoritmeve. Jo vetëm ku jetoni, por edhe atë që bëni dhe blini,” tha Iosifidis.
“Reklamimi i synuar mund të jetë diçka që ai mund ta shfrytëzojë më shumë. Është pak e frikshme që ai po hyn në tregun mediatik”.
“Ne ende duhet të jemi vigjilentë”
Megjithatë, për shkak të legjislacionit për mbrojtjen e të dhënave në mbarë botën, të dhënat personale që futen në Twitter nuk mund të përdoren ligjërisht për qëllime të tjera, si p.sh. për kompani të tjera të përdorura nga Musk ose nga dikush tjetër.
“Qoftë për makina apo media sociale, çdo kompani që operon në Evropë duhet të veprojë në përputhje me rregullat tona – pavarësisht nga aksionet e tyre”, postoi në Twitter Thierry Breton, Komisioneri i Bashkimit Evropian për tregun e brendshëm.
“Musk e di mirë këtë. Ai është i njohur me rregullat evropiane për automobila dhe do të përshtatet shpejt me Aktin e Shërbimeve Dixhitale,” shtoi ai, duke iu referuar propozimit të rregullores së BE-së që synon të nxisë konkurrencën e kompanive në unionin evropian duke parandaluar kompanitë e mëdha të abuzojnë me fuqinë e tyre në treg.
“Në Evropë dhe në pjesë të tjera të botës, ekziston një legjislacion i fortë për mbrojtjen e të dhënave, kështu që ne jemi mjaft të mbrojtur,” tha Naranjo.
“Megjithatë, ne ende duhet të jemi vigjilentë me faktin kur këto platforma të mëdha teknologjike bëhen edhe më të mëdha, ato bëhen një kërcënim edhe më i madh për privatësinë tonë, mbrojtjen e të dhënave dhe përgjithësisht për demokracitë tona”. /Euronews
VAZHDO TË LEXOSH MË TEPËR PËR TEMËN
