“Pyet mjekun” është rubrika më e re, një platformë që bën të mundur kontaktin ndërmjet mjekut dhe pacientit.
Nëse keni ndonjë pyetje, për gjithçka që ju shqetëson në shëndetin tuaj, këtu do të merrni përgjigje nga mjekë me eksperiencë, pa rezervime takimesh dhe duke shmangur radhët e gjata.
Pacienti: Si të pushojmë dhimbjen e kokës pa ilaçe
Mjeku: Pikëpyetjet mbi dhimbjet e kokës apo migrenën janë të pafundme, megjithatë kur bëhet fjalë për të dyja një gjë është e sigurtë: dhimbja nuk injorohet dot. Për pasojë, çdokush kërkon një zgjidhje të menjëhershme që largon dhimbjen sa hap e mbyll sytë. Ndonëse shërimi i dhimbjes së kokës kërkon kohën e vet, në vend të ilaçeve, secili prej nesh mund të shfrytëzojë këto mënyra natyrale kundër dhimbjeve.
Uji: Mund të tingëllojë e pabesueshme, por ka shumë raste që dhimbja shpërthen si pasojë e dehidratimit. Ky i fundit mundet të tjetërsojë humorin, ndjenjat dhe mendimet. Uji mund të mos shkurtojë kohëzgjatjen e dhimbjes por mund ta bëjë njeriun të ndihet më mirë.
Kompresat e ftohta: Një kompresë e ftohtë mund të jetë një zgjidhje shumë e lehtë kundër dhimbjes. Vendoseni atë në qafë ose në kokë dhe ftohtësia do të ngushtojë enët e gjakut dhe do të pakësojë inflamacionin. Kompresa është gjithësesi një zgjidhje afatshkurtër kundër dhimbjes.
Kompresa e ngrohtë: Kur dhimbja e kokës vjen si pasojë e tensionit ajo shoqërohet me kontraktim të muskujve. Në ndihmë vjen kompresa e ngrohtë që i qetëson ato. Në vend të kompresës mund të përdorni një peshqir të ngrohur ose të bëni një banjë të ngrohtë.
Fikni dritat: Njerëzit që vuajnë nga dhimbjet e kokës bëhen shumë të ndjeshëm ndaj dritës. Dritat e ndezura por edhe ajo e pajisjeve elektronike mund t’i përkeqësojë simptomat. Dhimbja e kokës mund të largohet ose zbutet duke ndenjur në një ambient të errët dhe jo me drita të forta. Rekomandohet të qendroni në një dhomë apo vend ku nuk ka shumë dritë.
Çajrat bimorë: Çaji i xhenxhefilit është shumë i mirë kundër migrenës. Një studim i vitit 2013, zbuloi se xhenxhefili ka të njëjtin efekt kundër migrenës si medikamentet. Çajra të tjerë bimorë që eliminojnë dhimbjen e kokës janë ai i nenexhikut, kamomilit dhe lavandës.
Nëse keni edhe ju pyetje, dhe doni të merrni një përgjigje të shpejtë nga mjekët e “spitalit tonë online”, klikoni këtu. Identiteti juaj do të mbetet anonim.
VAZHDO TË LEXOSH MË TEPËR PËR TEMËN
“Dhimbja e veshit të vajzës më shpëtoi jetën”
“Kisha probleme me sytë! Këto këshilla futi në ‘xhep’ dhe ti!”
