Për të gjithë individët, të ardhurat vjetore të të cilëve janë mbi 2 milionë lekë në vit ose 167 mijë lekë në muaj, 30 prilli është afati i fundit për të deklaruar të ardhurat për 2018-tën.
Kategoritë që kanë detyrimin për plotësimin e DIVA-s, Deklarata Individuale e të Ardhurave janë:
•Të ardhurat bruto nga paga apo shpërblimet nga marrëdhëniet e punësimit për individët.
•Të ardhurat bruto nga dividenti për pjesëmarrje në shoqëri tregtare apo nga veprimtaritë e biznesit;
•Të ardhurat bruto nga qiraja dhe fitimet kapitale nga shitja e pasurisë së paluajtshme, në pronësi të deklaruesit;
•Të ardhurat bruto nga interesa bankarë;
•Fitimi kapital neto, i krijuar nga investimet në tituj apo në pasuri të paluajtshme;
•Shuma bruto të fituara nga lotari apo lojëra të tjera të fatit;
•Të ardhurat bruto nga pasuria intelektuale, licencat, të drejtat ekskluzive dhe pasuri të tjera, që përbëhen vetëm nga të drejta dhe që nuk kanë formë fizike;
•Fitimi kapital nga dhurimi;
•Të ardhura bruto të realizuara jashtë territorit të Republikës së Shqipërisë;
Ndërkohë që për ata individë që janë të dy-punësuar, bëhet me dije se duhet të paguajnë tatim shtesë.
Sipas njoftimit të Tatimeve, të dypunësuarit pagat e të cilëve kalojnë shumën 167 mijë lekë në muaj, do të duhet të paguajnë më shumë.
Njoftimi i tatimeve:
“Tatimpaguesit individë të punësuar në më shumë se një vend pune dhe janë të detyruar të dorëzojnë DIVA-n, duhet të llogarisin sipas përcaktimeve të pikës 1, të nenit 9 të ligjit nr.8438, datë 28.12.1998 “Për tatimin mbi të ardhurat”, i ndryshuar, tatimin mbi të ardhurat personale nga punësimi për shumën totale të të ardhurave bruto nga pagat. Tatimit të llogaritur nga bashkimi i të ardhurave bruto nga punësimi (pagat) i zbritet tatimi i paguar nga punëdhënësit”.
Por, pse të dypunësuarit duhet të paguajnë tatim shtesë?
-Kjo sepse, totali i pagave bruto i bën ata subjetkt të normës 23%. Që do të thotë paga e tyre është mbi 150 mijë lekë, nga 13% që kanë paguar gjatë vitit për secilën pagë.
Ligji për tatimin mbi të ardhurat:
-Për pagën mujore mbi 30.000 lekë, tatimi është 0%
-Për pagën mujore 30.001-150.000 lekë, tatimi është 13%
-Për pagën mujore 150.001 lekë, tatimi është 15.600+23% e shumës mbi 150.000 lekë.
Kujtojmë që sipas njoftimit të tatimeve, individi deklarues, në momentin e deklarimit të të ardhurave vjetore, duhet të marrë në konsideratë faktin se tatimi do të duhet të logaritet mbi totalin e të ardhurave mujore, pra mbi totalin e të ardhurave nga të gjithë punëdhënësit.
Lehtësimi i vetëm për individin është rritja e kufirit të tatimit me 23% nga 130 mijë lekë në 150 mijë lekë nga 1 janari i këtij viti.
VAZHDO TË LEXOSH MË TEPËR PËR TEMËN
Biznesi, vërshojnë ankesat për Tatimet dhe Doganat
Asistenca e huaj për 2019, Tatimet miratojnë planin
