Drejtoria e Përgjithshme e Tatimeve lajmëron çdo individ rezident në Republikën e Shqipërisë të cilët përfitojnë të ardhura në shumën mbi 2,000,000) lekë në vit se janë të detyruar të paraqesë Deklaratën Individuale Vjetore të të Ardhurave.
DPT tha se deklarata individuale vjetore e të ardhurave është e detyrueshme të paraqitet gjithashtu edhe nga individët jo rezidentë, të cilët realizojnë të ardhura të tatueshme, me burim në Republikën e Shqipërisë, në shumën mbi 2,000,000 (dy milionë) lekë.
Sipas DPT, individët janë të detyruar të deklarojnë të ardhurat e tatueshme si më poshtë :
1.Të ardhura bruto nga paga apo shpërblimet nga marrëdhëniet e punësimit
2.Të ardhurat bruto nga dividenti
3.Të ardhurat bruto nga qiraja
4.Fitimi kapital nga shitja e pasurisë së paluajtshme në pronësi të deklaruesit
5.Të ardhura bruto nga interesat bankare
6.Fitimi kapital i krijuar nga investimet në tituj apo nga pasuri të paluajtshme
7.Shuma bruto të fituara nga lotaria apo lojëra të tjera të fatit.
8.Të ardhurat bruto nga pasuria intelektuale, licencat, të drejtat ekskluzive dhe pasuritë e tjera, që përbëhen vetëm nga të drejta dhe që nuk kanë formë fizike.
9.Fitimi kapitali nga dhurimi.
10.Të ardhura bruto të realizuara jashtë territorit të Republikës së Shqipërisë.
11.Të ardhura bruto të tjera të papërmendura më lart
DPT tha se çdo individ, i cili është i detyruar të paraqesë Deklaratën Individuale Vjetore të të Ardhurave, duhet të bëjë kujdesin e duhur për plotësimin e saktë të të dhënave të deklaratës dhe sidomos për llogaritjen e tatimit mbi të ardhurat nga punësimi, në rastet kur individi përfiton dy apo më shumë paga në një muaj nga punëdhënës të ndryshëm.
Në rast të plotësimit të pasaktë të Deklaratës Individuale Vjetore të të Ardhurave do të ketë penalitete për individin deklarues. Tatimi i llogaritur mbi pagat dhe shpërblimet nga marrëdhëniet e punësimit për individët, është kuti e lirë boshe në deklaratë dhe plotësohet nga vetë deklaruesi.
Sipas njoftimit, individi deklarues, do të llogarisë tatimin mbi të ardhurat personale nga pagat dhe shpërblimet për të gjitha të ardhurat nga pagat që përfitohen gjatë muajit, edhe në rastin kur ai i përfiton këto paga nga punëdhënës të ndryshëm. Në rastin kur shuma e të ardhurave të përfituara gjatë muajit nga dy apo më shumë paga tek punëdhënës të ndryshëm e kalojnë vlerën që tatohet me zero për qind (30,000 lekë), tatimi do të llogaritet mbi totalin e të ardhurave mujore nga pagat (totali i të ardhurave nga pagat tek të gjithë punëdhënësit).
DPT tha se në bazë të shumës së pagave të përfituara në total nga të gjithë punëdhënësit, individët do të bëjnë llogaritjet sipas skemës së mëposhtme :
1.Për shumën e pagave mujore deri 30,000 lekë tatimi është 0%
2.Për shumën e pagave mujore nga 30,001 lekë – 130,000 lekë tatimi është 13% e shumës mbi 30 000 lekë
3.Për shumën e pagave mujore nga 130,001 lekë e më tepër tatimi është 13,000 lekë plus 23% e shumës mbi 130,000 lekë
Tatimi i llogaritur në këtë mënyrë për çdo muaj të vitit, mblidhet për të 12 muajt e vitit dhe hidhet në një shumë të vetme në kutinë 4 të deklaratës, e cila përfaqëson tatimin vjetor të llogaritur për pagat dhe shpërblimet. Në kutinë 22 të deklaratës, individi do të shënojë shumën e tatimit të paguar dhe të mbajtur në burim nga çdo punëdhënës gjatë gjithë muajve të vitit.
Sipas njoftimit, diferenca midis tatimit të llogaritur, të shënuar në kutinë 4 të deklaratës, me shumën e tatimit të paguar, të mbajtur në burim nga punëdhënësit, të shënuar në kutinë 22 të deklaratës, përfaqëson shumën e detyrimit që duhet të paguajë individi në administratën tatimore për llogari të të ardhurave të tij vjetore nga punësimet.
DPT tha se shuma e tatimit të llogaritur, të vendosur në kutinë 4 të deklaratës, në asnjë rast nuk mund të jetë më e vogël se tatimi i mbajtur në burim dhe i paguar nga punëdhënësi për të ardhurat nga pagat dhe shpërblimet në lidhje me marrëdhëniet aktuale të punës gjatë vitit të vendosur në kutinë 22 të deklaratës.
Megjithatë, sipas njoftimit, në rastin e individëve, të cilët në asnjë muaj të vitit nuk kanë qenë të dy punësuar, shuma e tatimit të llogaritur, të vendosur në kutinë 4 të deklaratës, është gjithmonë e barabartë me tatimin e mbajtur në burim dhe të paguar nga punëdhënësi për pagat dhe shpërblimet në lidhje me marrëdhëniet aktuale të punës gjatë vitit, të vendosur në kutinë 22 të deklaratës.
Për sa i përket shpenzimeve të zbritshme do të përfitojnë tatimpaguesit, të cilët nuk janë subjekt i deklarimit dhe kanë të ardhura bruto vjetore nga të gjitha burimet deri në shumën 1 050 000 (një milion e pesëdhjetë mijë) lekë në vit (e indeksueshme çdo vit), por jo më të lartë se kjo shumë, të cilët mund të jenë subjekte deklaruese.
DPT tha se për efekt të llogaritjes së të ardhurës së tatueshme këta individë plotësojnë deklaratën vjetore të të ardhurave dhe përfitojnë shpenzimet e zbritshme, si më poshtë:
– shumën e interesit bankar të kredisë së marrë për shkollim, për vete apo për fëmijët dhe personat në kujdestari;
– shpenzimet për mjekim, për vete apo për fëmijët dhe personat në kujdestari, për pjesën e pambuluar nga sigurimi i detyrueshëm shëndetësor, sipas përcaktimeve të rregulluara me vendim të Këshillit të Ministrave.
Sipas njoftimit, kreditimi i shumave të përfituara nga skema e shpenzimeve të zbritshme kryhet brenda datës 30 shtator të vitit që pason periudhën tatimore, për të cilën është hartuar deklarata.
Personat jorezidentë nuk përfitojnë nga e drejta e llogaritjes së shpenzimeve të zbritshme. Deklarimi i të ardhurave, përveç se është detyrim ligjor, i çdo individi subjekt i deklarimit, është edhe një garanci më shumë, lidhur me justifikimin e pasurisë së tij.
DPT ka njoftuar të gjithë individët përkatës se deklarata për të ardhurat e përfituara në vitin 2018, dorëzohet vetëm në rrugë elektronike, nëpërmjet sistemit e-Filing, jo më vonë se data 30 prill e vitit 2019.
VAZHDO TË LEXOSH MË TEPËR PËR TEMËN
DPT bën njoftimin e rëndësishëm për tatimpaguesit
