Presidenti i Republikës së Shqipërisë, Ilir Meta. kujton ish-futbollistin e Partizanit dhe Kombëtares, tw ndjerin Lefter Millo, i cili sot do të festonte 54-vjetorin e lindjes. Kreu i shtetit çmoi kontributin e ish-mesfushorit legjendar kuqezi, i cili spikati në vitet ’80-’90 me Partizanin dhe në Greqi.
Meta vuri në dukje karakterin luftarak dhe shpirtin e paepur të Millos, i cili është pagëzuar në ambjentin e futbollit shqiptar si “Traktori”. Lefter Millo fitoi me Partizanin titullin kampion në vitin 1987, ndërsa në Greqi luajti për skuadrat e Larisës dhe Iraklisit të Selanikut në periudhën e demokracisë.
Fatkeqësisht, ai vdiq në moshën 30-vjeçare në afërsi të Larisas në një aksident automobilistik në 1997. Në vendlindjen e tij, Derviçan, është ngritur një statujë në kujtim të tij në vitin 2010.
MESAZHI I PRESIDENTIT ILIR META
Si sot, 54 vite më parë, në Derviçanin e dashur, lindi një nga ikonat e futbollit shqiptar, mesfushori energjik i Luftëtarit, Partizanit dhe Ekipit Kombëtar, Lefter Millo, të cilin përherë do ta kujtojmë me respekt e mirënjohje.
I pagëzuar nga tifozët e dashamirësit me nofkën “Traktori”, për talentin dhe mjeshtërinë e rrallë në fushën e blertë, Lefter Millo, la gjurmë të thella e të paharruara në historinë e futbollit shqiptar, së bashku me shumë korifej të tjerë si Panajot Pano, Vasillaq Zëri, Arjan Xhumba e Arjan Bellai, të cilët edhe pse me kombësi greke, e nderuan me besnikëri dhe devocion fanelën Kuq e Zi dhe ngritën lart emrin e Shqipërisë në arenën ndërkombëtare, duke u kthyer shembuj të jashtëzakonshëm për brezat e rinj e veçanërisht në simbole të bashkëjetesës së shkëlqyer ndëretnike në vendin tonë.
Futbolli ynë ka nevojë për modelin e vyer të Lefter Millos, i cili shkëlqeu edhe me ekipet më të mira të Greqisë, për shpirtin e tij të garës, dëshirën dhe vendosmërinë për të fituar, dhe jam i bindur se minoriteti grek do t’i japë sportit shqiptar të tjera talente dhe legjenda si ai.
U largua nga jeta aksidentalisht në kulmin e formës sportive, kur të gjithë prisnim të jepte maksimumin e tij, për të mbetur përgjithmonë në memorien tonë si fitimtari i dyluftimeve, i paepur, energjik dhe triumfues, për këdo që e adhuronte për karakterin dhe pasionin e tij të jashtëzakonshëm në fushën e blertë.
Lefter Millo është shembulli se si një fëmijë fshati vetëm falë pasionit, këmbënguljes dhe talentit mund të arrijë majat e suksesit. Mezi pres të rikthehem në Derviçian për të nderuar këtë legjendë të futbollit Kuq e Zi.
VAZHDO TË LEXOSH MË TEPËR PËR TEMËN
Meta dekoron dy legjendat e Kombëtares
Presidenti dekoron ikonat e basketbollit
